李衍蒨塗上紅色指甲油的手打開化妝袋，把園藝手套、鏟、畫掃等「架生」拿出來，又拿起一塊前臂長的白骨介紹，「呢塊係動物骨頭嚟，唔係人骨，係喺我做嘢嘅地方執返嚟。」
29歲的李衍蒨是一個法醫人類學家，她曾於美國邁阿密殮房實習，亦於東帝汶法證科擔任法醫人類學家及顧問，先後到過波蘭、塞浦路斯等地工作。她形容自己的工作為「屍骨代言人」：「法醫人類學家主要係以骨頭嘅知識去為逝者鑑定身份同生前資料，去幫在世嘅人同骨頭做一個橋樑去溝通，了解究竟佢之前經歷過咩事。」接觸最冰冷的骨頭及屍體，原因是因為她想帶給人溫暖：「我哋希望為佢哋搵番死者嘅尊嚴，因為我哋相信每一個人嚟到世界上，有尊嚴咁嚟，亦都應該有尊嚴咁走。」失散了親人的家屬，亦可藉由一個答案，正式開始他們療傷的過程。
「第一次接觸（屍體）係驚自己接受唔到屍體腐化嘅氣味，但係都好慶幸原來嗰種氣味最後自己係忍受到嘅。嗰陣味係一種聞過之後永遠都唔會忘記嘅氣味，係一種好獨特嘅氣味，如果要我形容，我會形容係喺街市檔拎條鹹魚嚟聞嘅酸臭味。」腐屍、屍蟲這些聽起來毛骨悚然的東西，是李衍蒨經常接觸的工作日常。以為她天生大膽，她卻說：「唔係㗎，我好怕睇鬼片，好怕睇恐怖片，但係我自己嘅諗法就係，當我做緊呢個專業嘅時候，我覺得自己出發點係好嘅，心態係想幫人嘅，反而唔會去諗太多，究竟係咪好恐怖好核突，而係想好專注地做好呢件事。」
人死後，身體慢慢腐化，最後與大自然融為一體。與死亡為伴的李衍蒨亦悟到「塵歸塵，土歸土」的道理：「每一次處理個案，都令我更深體會到，人生唔好太執着在世嘅嘢。死咗落到泥土嘅時候其實都係一樣，無論有幾多嘢都係帶唔走。」
撰文：鄭靖而
攝影：胡智堅